Gáttaþefur er jólaórói Styrktarfélags lamaðra og fatlaðra 2019. Karitas Sveinsdóttir og Hafsteinn Júlíusson hjá HAF STUDIO sáu um hönnun Gáttaþefs og Linda Vilhjálmsdóttir skáld samdi kvæði um kappann.
GÁTTAÞEFUR
í draumnum
eru þeir bræður að metast um það
hver skeri flottastar fléttur í brauðið
grýla og leppalúði
standa sveitt við steikingarpottinn
og veiða kökurnar upp löðrandi í feiti
þegar hellirinn hefur fyllst
af stökkum laufabrauðsstöflum
hrekkur hann upp með andfælum
lyktin liggur í loftinu
og hann stekkur slefandi á fætur
og þrammar af stað sleikjandi út um
yfir fjöllin og firnindin
og blæs ekki úr nös fyrr en við brauðhúsin
þar kastar hann mæðinni snöggvast
síðan rekur hann gríðarstórt gáttaþefsnefið
í gáttina og þefar
Linda Vilhjálmsdóttir
